DFCC බැංකුව ශ්‍රී ලංකාවේ කාන්තාවන්ට වඩාත්ම හිතකර රැකියා ස්ථාන 10 අතරට එක්වෙයි

Media Centre

Economic, social and environment development is deeply embedded in our values and informs how we conduct business, develop products and services and deliver on our goals and commitments.

DFCC බැංකුව ශ්‍රී ලංකාවේ කාන්තාවන්ට වඩාත්ම හිතකර රැකියා ස්ථාන 10 අතරට එක්වෙයි

November 30, 2021

ශ්‍රී ලංකාවේ ප්‍රමුඛතම වාණිජ බැංකුවක් වන DFCC බැංකුව, ශ්‍රී ලංකාව තුළ කාන්තාවන්ට රැකියාව කිරීමට සුදුසුම රැකියා ස්ථාන දහයෙන් එකක් ලෙස ඇගයීමට ලක් වී තිබේ. ශ්‍රී ලංකා වරලත් කළමනාකරණ ගණකාධිකාරී ආයතනය (CIMA Sri Lanka) සහ Satynmag.com එක්වී ප්‍රථම වරට සංවිධානය කළ 2021 ‘Women Friendly Workplace Awards’ (WFWP Awards) සම්මාන උළෙලේදී DFCC බැංකුව වෙත මෙම ඇගයුම හිමි විය.

ස්ත්‍රී පුරුෂ සමානාත්මතාව සහතික කිරීම සහ කාන්තාවන් සවිබල ගැන්වීම යනු DFCC බැංකුවේ තිරසාරත්ව ක්‍රමෝපායේ අනිවාර්ය අංග දෙකකි. සාධාරණ, විනිවිදභාවයෙන් යුත්, අපක්ෂපාතී සහ සියලු දෙනාම ඇතුළත් වන රැකියා විධිවිධාන ආයතනය තුළ ක්‍රියාවට නැංවීමට DFCC බැංකුව සෑම විටම කටයුතු කරයි.

WFWP සම්මාන උළෙල ආරම්භ කරන ලද්දේ, රැකියා ස්ථානයන් තුළ කාන්තාවන් දිරිගැන්වීම හා සවිබලගැන්වීම සිදුකරන සමාගම් හා ආයතන ඇගයීමට ලක්කිරීමේ අරමුණිනි. මෙමගින් ශ්‍රී ලංකාවේ රැකියා ස්ථාන තුළ කාන්තාවන්ගේ භූමිකාවේ වැදගත්කම අවධාරණය කරනු ලබන අතර, එය එක්සත් ජාතීන්ගේ තිරසාර සංවර්ධන ඉලක්ක අතර 5 වැනි ඉලක්කය වන ස්ත්‍රී පුරුෂ සමානාත්මතාව තහවුරු කිරීම සඳහා ශ්‍රී ලංකාව දරන උත්සාහයට සමගාමී පියවරක්ද වේ. ස්ත්‍රී පුරුෂ භේදයකින් තොරව රැකියා ස්ථානයන් තුළ සියලුම සේවක සේවිකාවන්ට සමාන අවස්ථාවන් සලසා දීමේ වැදගත්කම මෙමගින් පෙන්වා දෙනු ලබයි. බැංකු හා මූල්‍ය ආයතන ඇතුළුව සමාගම් හා ආයතන රැසක් මෙම සම්මාන වැඩසටහනට එක්වූ අතර, එය දේශීය ශ්‍රම බලකාය තුළ කාන්තා සහභාගීත්වය ඉහළ නැංවීම සහ ඔවුන් දිගින් දිගටම ශ්‍රම බලකාය තුළ රඳවා ගැනීම සම්බන්ධයෙන් ඉතා යහපත් ප්‍රවණතාවක් විය.

ව්‍යාපාරික ලොවේ ප්‍රමුඛයෙකු වන රවී අබේසූරිය, CIMA UK හි දකුණු ආසියානු කවුන්සිලයේ සාමාජිකා මනෝහාරී අබේසේකර, සුවසැරිය සභාපති දුමින්ද්‍ර රත්නායක, කොළඹ විශ්ව විද්‍යාලයේ මානව සම්පත් අංශයේ ප්‍රධානී මහාචාර්ය අරෝෂා අදිකාරම්, උතුරු පළාත් ආණ්ඩුකාර ජීවන් ත්‍යාගරාජා, CIMA මෙරට කළමනාකාරිනී සහරා අන්සාරි, සහ Satynmag.com නිර්මාතෘ/සංස්කාරිකා නයෝමිනී ආර්. වීරසූරිය යන මහත්ම මහත්මීහු මෙම සම්මාන උළෙලේ විනිශ්චය මණ්ඩලය ලෙස කටයුතු කළහ.

“කාන්තාවන්ට වඩාත්ම හිතකර රැකියා ස්ථාන 10 අතරට එක්වීමට ලැබීම DFCC බැංකුව ලැබූ විශාල ගෞරවයක්. කාටත් සමාන අවස්ථා ලබාදෙන සේවායෝජකයෙකු වශයෙන් ඒ සම්බන්ධ විශිෂ්ටතම ක්‍රමවේදයන් ක්‍රියාවට නංවමින්, ආයතනය තුළ කාන්තාවන් සවිබල ගැන්වීමට ගත් අඛණ්ඩ හා පුළුල් උත්සාහයන් නිසා අපට මේ ජයග්‍රහණය හිමිකර ගැනීමට හැකි වුණා. සියලු දෙනා වෙනුවෙන් සමාජ හා ආර්ථික වටිනාකම් නිර්මාණය කරමින්, සමානාත්මතාවෙන් පිරිපුන්, අභියෝග ජයගත හැකි අනාගතයක් නිර්මාණය කිරීම සඳහා අප යන ගමනට මෙම සම්මානය මහත් දිරියක් හා ශක්තියක් වේවි.” DFCC බැංකුවේ ප්‍රධාන විධායක නිලධාරී ලක්ෂ්මන් සිල්වා මහතා පැවසී ය.

DFCC බැංකුව පිළිබඳව

DFCC බැංකුව වසර 65 කට අධික ප්‍රෞඪ උරුමයක් හිමි, ශ‍්‍රී ලංකාවේ ප‍්‍රමුඛතම මූල්‍ය සමාගමකින් පැවත එන, පරිපූර්ණ වාණිජ හා සංවර්ධන බැංකු සේවාවන් සපයන වාණිජ බැංකුවකි. එම බැංකුවට 2021 වසරේදී එක්සත් රාජධානියේ Global Brands Magazine වෙතින් ‘ශ්‍රී ලංකාවේ වඩාත්ම විශ්වාසය දිනූ පාරිභෝගික බැංකුකරණ සේවා සන්නාමය’ සහ ‘ශ්‍රී ලංකාවේ විශිෂ්ටතම පාරිභෝගික සේවා බැංකුකරණ සන්නාමය’ යන සම්මාන හිමි විය. එමෙන්ම Business Today සඟරාව මගින් DFCC බැංකුව ශ්‍රී ලංකාවේ ප‍්‍රමුඛතම සමාගම් 30 අතරට නම්කර ඇත. තවද එම බැංකුව ICRA Lanka සමාගම වෙතින් [SL] AA- ස්ථාවර’ ශ්‍රේණිය සහ Fitch Ratings Lanka සමාගම වෙතින් ‘A+ (lka)  ස්ථාවර’ ශ්‍රේණිය හිමිකරගෙන තිබේ.

ඡායාරූපය:

(වමේ සිට) කොළඹ සිනමන් ග්‍රෑන්ඩ් හෝටලයේදී පවත්වන ලද සම්මාන උළෙලට එක්වූ DFCC බැංකුවේ ජ්‍යෙෂ්ඨ උප සභාපති (මානව සම්පත්) සොනාලි ජයසිංහ, ජාත්‍යන්තර මූල්‍ය ආයතනයේ ‘Women in Work Sri Lanka’ වැඩසටහන් කළමනාකාරිනී සේරා ට්විග්,  Satynmag.com නිර්මාතෘ/සංස්කාරිකා නයෝමිනී වීරසූරිය සහ CIMA ආයතනයේ මෙරට කළමනාකාරිනී සහරා අන්සාරි යන මහත්මීන්